الجمعة 10/مايو/2024 - 09:39 م

ودعت  سمر حمزة، لاعبة منتخب مصر للمصارعة، التصفيات العالمية المؤهلة لأولمبياد باريس 2024، والمقامة حاليا في تركيا.

سمر حمزة خارج أولمبياد باريس 2024 

وفقدت سمر حمزة، فرصتها في التأهل إلى أولمبياد باريس 2024، بعد أن خسرت أولى مبارياتها في البطولة، أمام منافساتها المنغولية.

وكتبت سمر حمزة، عبر صفحتها على فيسبوك توضيحًا بعد خسارتها امام لاعبة مانغوليا في وزن  76 كيلو جرام، قائلة: أولًا أنا حابة أقول الحمدلله والشكر لله، لله ما أخذ وله ما أعطى، وكل شيء عنده بأجل مسمى، أسال الله أن يعينني بقولها، وبنفس راضية، حابة بس أوضح لكل الناس اللي متابعني وبيحبوا سمر.

وأضافت: أعرفكم عليّ من جديد، أنا سمر حمزة، بدأت مصارعة آخر 2013، وعمري ساعتها 18 عامًا، يعني لعبت المصارعة، في سن كبير جدا لإمكانيات لعبه عنيفة زي المصارعة، بقالي 11 عامًا في اللعبة الحمد لله فضل ونعمة من ربنا، إني أبقى صاحبة ميداليتي عالم، وأبقي مصنفة على العالم سنتين وراء بعض، وفضلت بطلة إفريقيا من 2014 لحد 2023، وغير إني شاركت في أولمبياد ريو وطوكيو، وغير الميداليات الدولية، أحب أوضح ليكم إني بقالي سنة بتمرن.

رسالة مؤثرة من سمر حمزة للجمهور

واستكملت سمر حمزة: أنا عندي قطع كامل في الغضروف، واتحاملت على نفسي، ومعملتش عملية، عشان مضيعش حلمي اللي بقالي 4 سنين بتمرن علشانه، وكنت بلعب وبكسب ورغم كدة مطلعتش بررت شيء، عشان أنا بلعب لنفسي لذاتي مش مستنية شيء من حد، ويشاء القدر واتصاب في الترقوة قبل التأهيل بردو بقت الإصابات غضروف وترقوو.

وأردفت: الدكتور قال لي ملعبش، بس جوايا حلمي فرض عليا إني أكمل، واتمرنت قبل البطولة أسبوعين بخش اتمرن بمسكن عشان أحقق حلمي يشاء الله بعدم التوفيق ليا، وفي حاجة تانية حابة أوجه بس رسالة لبعض الناس، أنا مخدتش رزق حد ولا خدت مكان حد أنا اجتهدت وربنا جزاني، مفيش حاجة اسمها خدت أكتر من حقها، بلاش تقولوا كلام مش فاهمين معناه.

وواصلت لاعبة مصر للمصارعة: عشان أي حاجه بتيجي لأي شخص فهو رزق من عند الله ولا أنت اللي بتدي ولا الشخص اللي عطاني هو مجرد بيوصل الرزق اللي ربنا كاتبه ليك، أنا مش بقول كل الكلام ده عشان حد يتعاطف معايا، بس حبيت أوضح عشان سمر حمزة عمرها ما هتضيع حلمها، وهترتاح وهترجع وهتحقق بردو حلمها، مختتمة:  كنت حابة أفرح وأفرحكم بس إرادة ربنا فوق كل شيء.